بسم اللہ الرحمن الرحیم
آج ایک عرصہ کے بعد اپنے صوبہ بہار وجھارکھنڈ بلکہ مشرقی ہند کی ممتاز دینی تعلیم گاہ مدرسہ حسینیہ کڈرو ،رانچی میں حاضر ہونے کا موقعہ ملا ،اس سے پہلے متعدد بار حاضری ہوچکی ہے ،الحمد للہ ہربار مدرسہ کو ترقی کی نئی شاہراہ پر دیکھتا ہوں ،مدرسہ کے تعلیمی نظام میں حفظ وتجوید کے علاوہ درجہ عربی میں ششم تک تعلیم ہوتی ہے ،طلبہ جو مدرسہ میں قیام پذیر ہیں اور جن کی کفالت مدرسہ کرتا ہے ان کی تعداد ایک ہزار ہے ،مدرسہ میں عمدہ تعلیم کے ساتھ تربیت کا اچھا نظم ہے ،یہاں ایک عجیب ایمانی اور روحانی فضا دیکھنے کو ملتی ہے ،یہ مدرسہ شیخ الاسلام حضرت مولانا حسین احمد مدنی نوراللہ مرقدہٗ کی یاد گار ہے اور اس مدرسہ کے بانی وروحِ رواں حضرت شیخ کے شاگرد اور مجاز حضرت مولانا ازہر صاحب ہیں ،جن کی مسلسل مخلصانہ جد وجہد سے یہ مدرسہ اکابر واسلاف کے طریقہ پر کتاب وسنت کی تعلیم دے رہا ہے ۔
اہل خیر مسلمانوں سے اپیل ہے کہ وہ اس مدرسہ کی ترقی اور استحکام میں پورا تعاون دیں ،میری دعا ہے کہ حق تعالیٰ اس مدرسہ کو ترقی کے اعلیٰ مدارج تک پہنچائے ،اساتذۂ کرام سب ہی باصلاحیت ہیں ،طلبہ کا لباس اور ان کی وضع قطع بھی اسلامی ہے ،ان شاء اللہ اس مدرسہ سے داعیانہ کردار اور عالمانہ وقار رکھنے والے علماء پیدا ہوں گے ۔ نظام الدین ‘۔ ۱۹محرم الحرام ۱۴۲۹ھ مطابق ۲۸جنوری۲۰۰۸ء